ለሥር ነቀል ለውጥ ሕዝባዊ የክተት ጥሪ ሊታወጅ ይገባል!(ከአንድነት ለአማራ ኅልውና ትግል የተሰጠ መግለጫ)

አንድነት ለአማራ ኀልውና ትግል (አንድነት) የትግሉ ስልታዊና ስትራቴጂካዊ ድጋፍ ሰጭ ድርጅት ሆኖ በመስራት ላይ ይገኛል፡፡ በዋናነት የትግል ስትራቴጂካዊ ምልከታዎቻችን በሦስት አውድ በመቃኘት፣ ራስን የመከላከል ትግልን፣ ከተሞችን ማዕከል ያደረገ ህዝባዊ ንቅናቄን  እና ስትራቴጂያዊ ጥምረቶችን ያቀፈ እንዲሆን በልዩ ትኩረት ድጋፋችን እንደቀጠለ ነው፡፡

በአሁኑ ሰዓት በኢትዮጵያ በተለያዩ የኀብረተሰብ ክፍሎች የተጀመረውን የከተማ ንቅናቄ ወደሙሉ ህዝባዊ ኃይል እንዲቀየር በተቀናጀ መልኩ የሀሳብ ድጋፎች በማድረግ ላይ የሚገኘው አንድነት፣ ለሥር ነቀል ለውጥ ሕዝባዊ የክተት ጥሪ ሊታወጅ ይገባል ብሎ ያምናል፡፡

ሀ) ጥቅል የሁኔታ ግምገማዎች

የብልጽግናው አገዛዝ በሚከተለው የጦርነት ፖሊሲ የተነሳ፣ መቶ ሺሕዎችን የቀጠፉ ጦርነቶች አቅጣጫና ምክንያት እየቀያየሩ ቀጥለዋል፡፡ ባለፉት ሰባት ዓመታት፣ የጅምላ መፈናቀል፤ በጅምላ ማለቅ፤ የድህነት ማጥ፣ ግፍ፣ ስቃይ፣ መከራና ቸነፍር በአማራ እና በሰፊው የኢትዮጵያ ሕዝብ ላይ ተፈጽሟል፡፡ 

አገዛዙ ወደሥልጣን ከመጣ ጊዜ ጀምሮ በመቶ ሺህዎች ለሚቆጠሩ ንጹሃን እልቂት ምክንያት የሆነ፣ ጦርነት እንደምግብ ዕለት በዕለት የሚፈለፍል ጦረኛ እንደሆነ ሕዝብ በበቂ ሁኔታ ተረድቶታል፡፡ 

በተለይም የብልጽግናው መሪ ዐቢይ አሕመድ ከቀዝቃዛው የዓለም ጦርነት ወዲህ ከተነሱ የጦር ወንጀለኞች እንደአንዱ የሚቆጠር ስለመሆኑ፣ በአማራ ሕዝብ ላይ የቀጠለው የጦር ወንጀል ጉልህ ማሳያ ሆኖ ይቀርባል፡፡ ቢቢሲን ጨምሮ ዓለማቀፍ ሚዲያዎች እያወጡት ያለው የምርመራ ሪፖርት፣ አስገድዶ መድፈር፣ አካል መቆራረጥና የጭካኔ ግድያዎቹ ኢትዮጵያዊያንን ብቻ ሳይሆን የሰው ዘርን በሙሉ በጸረ-ብልጽግና ትግል ሊያሰልፍ የሚችል ነው፡፡ 

በታሪክ፣ በባህልና በስነ-ህዝብ የአማራ ታሪካዊ አካል በሆነው መተከል ቡለን ወረዳ፣ ህዳር 13፣ 2018 ዓ.ም ከጠዋቱ 12፡00 ሰዓት በአማራ ተወላጆች ላይ በተፈፀመ ብሄር ተኮር የጅምላ ጥቃት ከ50 በላይ ህፃናት፣ ሴቶች፣ አረጋዊያን እና ሰላማዊ አርሶ አደሮች በኦህዴድ ብልጽግና መዋቅራዊ ድጋፍ በታጣቁ ኃይሎች መገደላቸው ብቻውን መላውን ሕዝብ በቁጣ ወደአደባባይ ሊያስወጣ ይገባል ብለን እናምናለን፡፡ ይህ የጅምላ ጥቃት፣ በአማራ ተጀምሮ በአማራ ብቻ የሚያበቃ ሳይሆን፣ ቀሪ የኢትዮጵያ ዘውጎችንም እንደሚያዳርስ አደጋው ከወዲሁ እየታየ ይገኛል፡፡ 

ዘውግ ዘለል በሆነችው እና ከ60 ሚሊየን በላይ የእምነቱ ተከታይ ባላት የኢትዮጵያ ኦርቶዶክስ ተዋሕዶ ቤተክርስቲያን ላይ የቀጠለው መዋቅራዊ ጥቃት፣ አገር የሰራች ቤተክርስቲያን በገዛ አገሯ ስደት ላይ ነች፡፡ 

ከተለያዩ ዘውጎች የተውጣጡ ምዕመኖቿም በየዕለቱ የጅምላ እልቂት ሰለባ ሆነው ቀጥለዋል፡፡ ኦሕዴድ ለጥፋት ዓላማው የዘውግም፣ የኃይማኖትም አጥር እንደማይገድበው ለሥልጣን ዓላማው ሙስሊሙንም ክርስቲያኑንም፤ ከተለያየ ዘውግ የወጣውን እንደሚፈጅ ባላፉት ሰባት ዓመታት በተጨባጭ ያየነው መራር እውነት ነው፡፡ 

ለ) የትግል ሁኔታዎች

አሁን ባለው የኢትዮጵያ ሁኔታ፣ ራስን ለመከላከል ከሚደረገው ትግል በተጨማሪ በከተሞች ሕዝብን ማዕከል ያደረገ ንቅናቄ መቀጣጠል የሚችልባቸው አስቻይ የትግል ሁኔታዎች አሉ፡፡

ለህዝብ ያለውን ጥላቻ ከብሔር ወደ ብሔራዊነት ከፍ ያደረገው አገዛዙ በመላ አገሪቱ ለመንግሥት ሰራተኛው የወቅቱን የኑሮ ውድነት ያገናዘበ ደመወዝ መክፈል ያልቻለበት ሁኔታ ተፈጥሯል፡፡ ይህንን ተከትሎ በሁሉም የአገሪቱ ክፍል ተቃውሞ እየበረታበት ነው፡፡ 

መምህሩ፣ የፋብሪካ ሠራተኛው፣ የጤና ባለሙያው፣ ጡረተኛው ሁሉ በአገዛዙ ላይ ጥያቄ እያነሳ ይገኛል፡፡ የከፍተኛ ትምህርት ተቋማት ተማሪዎች በአገዛዙ የትምህርት ፖሊሲ ላይ የመረረ ተቃውሞ በማሰማት ላይ ናቸው፡፡ 

ለዚህ ሰላማዊ ተቃውሟቸው በአገዛዙ የተሰጣቸው ምላሽ፣ ጥይት ስለመሆኑ ደባርቅ ዩኒቨርሲቲ ላይ ሁለት ተማሪዎች በግፍ መገደላቸውን አረጋግጠናል፡፡ ከ15 በላይ በሚሆኑ የመንግሥት ዩኒቨርሲቲዎች የተሰማው የተማሪዎች የተቃውሞ ድምጽ፣ መሰረታዊ መነሻው የዐቢይ አሕመድ የአመራርና ፖሊሲ ወድቀት በመሆኑ፤ ጥያቄው ከፍ ማለት እንዳለበት የደባርቅ ዩኒቨርሲቲ የተማሪዎች ግድያ ማረጋገጫ ሆኗል፡፡ 

ይህም ተማሪዎች ጥያቄቸውን ከአንድ ነጠላ የፖሊሲ ለውጥ ጥያቄ ወደሥር ነቀል ለውጥ ማሳደግ እንዳለባቸው አመላካች ሆኗል፡፡

በአዲስ አበባ ያለው የኑሮ ውድነትና የሠራተኞች ሕይወት እጅግ አሳሳቢ ከመሆኑ የተነሳ ቁጥራቸው ቀላል ያልሆኑ የመንግሥት ሠራተኞች የሆቴል ትርፍራፊ ምግብ ገዝተው ለመብላት   እንዳይችሉ በጨካኙ አገዛዝ ክልከላ ተደርጎባቸዋል፡፡ የምሳ ሰዓታቸውን በካፌ ሳይሆን በእምነት ተቋማት በጸሎት የሚያሳልፉ የመንግሥት ሰራተኞች የከተማ ረሃብ ስለመግባቱ አመላካች ሆነዋል፡፡ 

የመንግሥት ሠራተኛን ደመወዝ መክፈል ያልቻለው የብልጽግናው አገዛዝ፣  በተቃራኒው 10 ቢሊየን ዶላር አውጥቶ ቅንጡ ቤተመንግሥት እየገነባ ነው፡፡ ይህን የሚያደርግ አገዛዝ፣ አርሶ አደሮችን አስገድዶ የተለያየ መዋጮ ያስከፍላል፡፡ ጎተራቸውን የመገልበጥ ያህል እንደቋሚ ሽፍታ በግብር፣ በሚሊሻ ቀለብ፣ በአገልግሎት ክፍያ እና በልዩ ልዩ መዋጮዎች የእናቶችን መቀነት ይፈታል፡፡ የአባወራን ኪስ ያራቁታል፡፡ 

በዚህ ሁኔታ የሚገኘው ግፈኛው የብልጽግናው አገዛዝ በሕዝብ ትግል ሊገረሰስ ይገባል! 

በመሆኑም ሌላኛው አማራጭ የትግል መንገድ ሕዝባዊ ተጋድሎ (civil resistance) ነው፡፡ ሕዝባዊ ተጋድሎ ሰፊው ሕዝብ ካለምንም ኃይል እርምጃ፣ ስለመብቶቹ፣ ስለነጻነቱ እና ስለፍትህ መከበር የሚታገልበት መንገድ ነው። 

በሕዝባዊ ተጋድሎዎች ላይ የሚሳተፉ ሰዎች፣ ሥርዓታዊ ለውጥ እንዲኖር የማድረግ አቅም አላቸው፡፡ በዓለም ዙሪያ ሕዝባዊ ተቃውሞ በተለያዩ ስሞች ይጠራል። ሰላማዊ ትግል (nonviolent struggle)፣ ቀጥተኛ እርምጃ (direct action)፣ ሕዝባዊ ኃይል (people power)፣ ፖለቲካዊ እምቢተኝነት፣ እና ሕዝባዊ የክተት ጥሪ ተብሎ ይጠራል። 

ሆኖም ግን፣ በየትኛውም ዓይነት ስያሜ ቢጠራ የሕዝባዊ ተቃውሞ መሰረታዊ እንቅስቃሴ ተመሳሳይ ነው። እንደ አንድነት ደረጃ በደረጃ መከወን ያለባቸው የከተማ ትግል ስልቶች እንዳሉ ያምናል፡፡ በዚህ ሂደት ቁልፉ ጉዳይ ሕዝባዊ ኃይል (people power) መፍጠሩ ላይ በመሆኑ፣ በጉዳዩ ላይ (የሀሳብ፣ የቴክኒክ፣ የሰነድ፣… ወዘተ) ድጋፎችን ማድረጋችንን እንቀጥላለን፡፡ 

ሐ) የትግል ባለድርሻዎችን የማስፋት ስትራቴጂ 

የትግል እንቅስቃሴዎች ወይም ዘመቻዎች መጠነ ሰፊ የሆነ አንድነትን ማዳበር ከቻሉ፣ ዕቅዶችን በጥንቃቄ በመንደፍ ከተሞችን ማዕከል ባደረገ ሕዝባዊ የክተት ጥሪ አገዛዙን መናድ ይቻላል፡፡ በዚህ የትግል ሂደት አንድነት ወሳኝ ነገር ነው። ምክንያቱም የተቃውሞ እንቅስቃሴዎች የብዙሃኑን ፈቃድ እና ድርጊት ያማከሉ ሲሆኑ፤ ከፍተኛ አቅም ይኖራቸዋል፡፡ 

በጥቅሉ፡- ስኬታማ የሆኑ የሕዝባዊ ተቃውሞዎች ወንዶችን እና ሴቶችን፣ ወጣቶችን እና አረጋውያንን፣ ከተለያዩ ብሔሮች እና ሀይማኖቶች የተውጣጡ፣ ተማሪዎች፣ ላብ አደሮች፣ ምሁራን እና ነጋዴዎችን እንዲሁም ሌሎች የማኅበረሰብ አባላትን በጋራ ያካትታሉ።

በከተሞች የሚፈጠሩ ሕዝባዊ ንቅናቄዎች ድሉን በማፍጠን ረገድ ትልቅ ዋጋ እንዳላቸው አንድነት ዓለማቀፍ ተሞክሮዎችን ለማጥናት ባደረገው ጥረት አረጋግጧል፡፡ በዚህም የከተማ መሰረት ያለው ትግል በኢትዮጵያ ሰፊ የለውጥ ዕድል እንደሆነ እናምናለን፡፡ 

ዋናው ነገር ከአማራ ብሎም ከኢትዮጵያ ተጨባጭ ሁኔታዎች ጋር በማዛመድ፤ የከተማ ግንባር እና ስትራቴጂያዊ ጥምረቶችን የኀልውና ትግሉ አካል ለማድረግ ቁርጠኛ ሆኖ መገኘት መቻሉ ላይ ነው፡፡

በመሆኑም፡- 

1. የፋኖ ኃይሎች በአንድ ወጥ አመራርና የፖለቲካ ፕሮግራም ተደራጅተው ራስን የመከላከል ትግሉን ወደዘላቂ ድሉ እንዲያሻግሩ በኢትዮጵያ የተፈጠሩ የለውጥ ዕድሎችን በአግባቡ እንዲጠቀሙ በድጋሚ ጥሪያችንን እያቀረብን፣ አንድነት የሚጠበቅበትን ስልታዊና ስትራቴጂካዊ ድጋፍ መስጠቱን እንደሚቀጥል ያረጋግጣል፡፡

2. ደመወዙን የተከለከለው የመንግሥት ሠራተኛ፣ የተዘነጋው ጡረተኛ፣ በዕድሜቸው ላይ እየተቀለደባቸው ያሉ የከፍተኛ ትምህርት ተቋማት ተማሪዎች፣ የዘረኛ ፖሊሲ ጥቃት ሰለባ የሆኑ ነጋዴዎች፣ በኮሪደር ልማት ሰያሜና በሌሎችም አልባሌ ሰበቦች ሐብትና ንብረታቸውን የተቀሙ የከተማ ነዋሪዎች: ቤተ እምነታቸው እየወደመባቸውና እየታረዱ የሚገኙ አማኞች፣ በማያምንበት ጦርነት እየተማገደ ያለው የአገዛዙ ወታደር፣ በሙሉ ይህን አገዛዝ ለመጣል በሚደረገው ትግል ሕዝባዊ የክተት ጥሪውን እንዲቀበሉ አንድነት ኑ ራሳችንና ኢትዮጵያን እናድን ሲል ይጣራል!  

3. የብልጽግናው አገዛዝ ጀንበር የምትጠልቀው ሁላችንም፣ የትም ቦታ፣ ሁልግዜ በቻልነው አቅም ስንታገል እንጂ፤ ትግሉን ለአንድ አካል አደራ በመስጠት እንዳልሆነ እያሳሰብን፣ በውጭ አገር የምትገኘው ዲያስፖራ ወገናችን ለሥር ነቀል ለውጥ የሚደረገውን ሕዝባዊ የክተት ጥሪ በያለበት እንዲቀላል፡፡ ይህ ትግል አካላዊ ብቻ ሳይሆን የኢኮኖሚ፣ የዲፕሎማሲ፣ የሥነ-ልቦና፣ የሚዲያ፣ የመረጃ፣… ወዘተ በመሆኑ ሕዝባዊ የክተት ጥሪውን በሁሉም አማራጮች እንዲያሳካ ጥሪያችንን እናቀርባለን! 

4. ዓለም-ዓቀፉ ማህበረሰብ በኢትዮጵያ ውስጥ እየተካሄደ ያለውን የነጻነት እና የፍትህ ትግል በተለይም ደግሞ የአማራ ሕዝብን የኀልውና ትግል በአግባቡ ተረድቶ የጦር ወንጀለኛው የብልጽግና አገዛዝ በሕዝብ ላይ የፈጸማቸውን የጦር ወንጀሎች ገለልተኛ በሆነ አጣሪ መንገድ እንዲያጣራ፣ በአገዛዙ ላይ ተጠያቂነትን እንዲያረጋግጥ ጥሪያችንን እናቀርባለን፡፡ 

በመጨረሻም፤ 

በኢትዮጵያ ላይ ያንዣበበውን የመፍረስ አደጋ ለማስቀረት፤ ሕዝብን ከዚህ የከፋ እልቂት ለማዳን በሚደረገው የኀልውና ትግል የከተማው ሕዝብ በተለይም የተማረው ኃይል፣ የማይተካ ሚና አለው፡፡ 

በመሆኑም፣ ለራሱም ሆነ ለአገር ህልውና ጥቅም መቆም ያልቻለ ሲቪል ሰርቫንትም ሆነ ምሁር፤ ለማንም መጥቀም ስለማይችል፤ በራሱና በቤተሰቡ ጉሮሮ ላይ የቆመውን ሥርዓት በጽኑ መታገል እንደሚገባው፣ ሕዝባዊ የክተት ጥሪው በአደባባይ ላይ እንዲረጋገጥ ወሳኝ አቅም መሆን ይኖርበታል፡፡

በተለይም መምህራን፣ የጤናና ግብርና ባለሙያዎች፣ ሌሎች የሙያ ማኀበራት የከተማ ትግል ግንባሩን እንድትቀላሉ ጥሪውን የሚያቀርበው አንድነት፣ በከተሞች ለሚካሄዱ ንቅናቄዎች ልዩ ትኩረት በመስጠት ስልታዊና ስትራቴጂካዊ ድጋፎቹን አጠናክሮ እንደሚቀጥል ያረጋግጣል፡፡ 

ድል ለአማራ ፋኖ!

ድል ለአማራ ሕዝብ!

ድል ለኢትዮጵያ ሕዝብ!

አንድነት ለአማራ ኅልውና ትግል (አንድነት)

ህዳር 16/2018 ዓ.ም.